.png)
Die Gideonsorganisasie het gister ’n besoek aan Hoërskool Ben Viljoen gebring en vir elke graad 8-leerder ’n Sakpas Bybel oorhandig. Hierdie kosbare geskenk simboliseer ’n bron van geloof, hoop en leiding wat ons leerders hopelik nog vir baie jare op hul lewensreis sal vergesel.
Die oorhandiging van dié Bybels is ’n betekenisvolle oomblik vir ons nuwe Dallers. In ’n wêreld vol uitdagings en belangrike keuses, hoop ons dat hierdie Bybel vir elke leerder ’n gids sal wees – ’n bron van wysheid, rigting en hoop – sodat hulle lewenslegkaart stukkie vir stukkie in plek sal val.
By Hoërskool Ben Viljoen glo ons daarin om nie net akademiese groei te bevorder nie, maar ook karakter, waardes en geloof te koester. Hierdie gebaar van die Gideons dien as ’n herinnering dat klein dade van omgee ’n groot en blywende impak kan hê.
Ons spreek ons opregte dank en waardering uit teenoor die Gideons vir hierdie betekenisvolle bydrae tot ons leerders se lewens. Mag elke Bybel met oop harte ontvang word en ’n ligdraer wees op elke jongmens se pad vorentoe.