.png)
“Ontwerp is nie net wat ons sien nie – dit is wat ons voel wanneer ons ’n ruimte betree.” Hierdie woorde beskryf die inspirerende reis van een van ons alumni-lede, Gabriella Serrano, wat deel was van die matriekklas van 2022 en onlangs haar Baccalaureusgraad in Interieurontwerp aan die Inscape Education Group se Stellenbosch-kampus voltooi het.
Gabriella beskryf haar studente jare as uitdagend, maar ongelooflik vervullend. Gedurende hierdie tyd het sy nie net kreatief gegroei nie, maar ook geleer hoe ontwerpruimtes kan vorm wat emosie en betekenis dra.
Tydens haar studies het sy aan verskeie projekte gewerk, maar dit was haar finale projek wat uitgestaan het. Hierdie projek het gefokus op die ontwerp van ’n onkologiesentrum – ’n ruimte waar genesing, herinnering en menslike verbintenis sentraal staan. Vir Gabriella was hierdie projek veel meer as net ’n akademiese taak; dit was ’n persoonlike reis. Sy vertel dat die konsep deur haar pa geïnspireer is en dat dit vir haar ’n manier geword het om haar emosies en persoonlike storie deur ontwerp uit te beeld.
In ’n onderhoud met haar het Gabriella haar opregte dankbaarheid uitgespreek vir die grondslag wat by Hoërskool Ben Viljoen gelê is. Die ondersteuning, aanmoediging en waardes wat sy hier ontvang het, het haar die selfvertroue gegee om haar passie met oorgawe na te jaag en haar plek in die kreatiewe wêreld voluit in te neem.
Ons is ongelooflik trots op Gabriella se prestasie. Sy is ’n ware voorbeeld van hoe passie, deursettingsvermoë en ’n droom wat met hart aangepak word, tot iets besonders kan ontwikkel. Ons wens haar alle voorspoed toe vir die opwindende pad wat voorlê en sien uit daarna om haar toekomstige suksesverhale te volg.