.png)
Hoërskool Ben Viljoen is trots om ’n besonderse storie van tradisie, leierskap en familietrots uit te lig wat oor drie dekades by Boomhuis Seunskoshuis strek.
In 1996 is Herman de Klerk aangewys as die Hoofseun van Boomhuis Seunskoshuis vir die jaar 1997. Dertig jaar later word hierdie besonderse stukkie geskiedenis herhaal met sy seun, SJ de Klerk, wat gisteraand aangewys is as die Hoofseun van Boomhuis Seunskoshuis vir 2027.
Dié merkwaardige gebeurtenis is ’n bewys van die sterk tradisies en waardes wat van geslag tot geslag voortgedra word. Hoewel drie dekades tussen die twee aanstellings verloop het, verbind dieselfde koshuis en dieselfde besonderse leierskapsposisie pa en seun op ’n unieke manier.
Hoewel die tye verander het, bly die voorreg om as Hoofseun leiding te neem, ’n uitsonderlike eer. Dit bied die geleentheid om leiding te neem, ’n positiewe voorbeeld te stel en ’n betekenisvolle bydrae tot die koshuislewe te lewer. Vir SJ is hierdie aanstelling des te meer besonders, aangesien hy nou die geleentheid kry om sy eie hoofstuk in die De Klerk-familie se Boomhuis-verhaal te skryf.
Baie geluk SJ met hierdie welverdiende aanstelling! Ons wens jou alle sterkte en sukses toe met jou leierskapsrol in 2027. Mag jy hierdie verantwoordelikheid met trots, integriteit en toewyding aanpak en ’n blywende positiewe nalatenskap by Boomhuis Seunskoshuis agterlaat.
’n Pa se nalatenskap, ’n seun se nuwe hoofstuk – dit is Dallertradisie wat oor generasies heen voortleef!