.png)
In ’n onsekere en onstabiele tydperk in die geskiedenis het julle in 2021 as verwarde graad 8’s deur die hekke van Hoërskool Ben Viljoen gestap - gepantser met ’n masker, ’n bottel ontsmettingsmiddel en ’n hart vol vrae. Julle het ’n wêreld betree wat anders gelyk het as die een waarvoor julle voorberei is: gange was stiller, glimlagte versteek, en afstand deel van die nuwe normaal. Maar tog het julle gestap - dapper, nuuskierig en bereid om aan te pas. Daardie eerste tree het reeds gewys watter soort matrieks julle eendag sou wees.
Klas van 2025, lig op jou kop. Dit klink eenvoudig, amper alledaags, maar binne hierdie woorde skuil ’n kragtige waarheid. Om jou kop te lig is die eerste teken dat jy bereid is om die wêreld vierkantig in die oë te kyk - dat jy weier om vas te kyk teen die struikelblokke van vandag, en eerder jou blik rig op die moontlikhede van môre. Wanneer jy jou kop lig, sien jy verder as die onmiddellike uitdagings. Jy sien geleenthede, drome en roepings wat wag om aangegryp te word. Jy verstaan dat groot oorwinnings nie uit een groot sprong gebou word nie, maar uit klein, konsekwente keuses: om te probeer, om aan te hou, en om elke keer weer op te staan wanneer jy val.
“Lig jou ken en ken jou lig.” Hierdie woorde, oorspronklik van Magé Trotskie, destyds hoofdogter van C&N Sekondêre Meisieskool Oranje en vandag bekend as Vir Nou Net Magé, dra ’n wysheid wat die moeite werd is om vas te hou. In haar toespraak in 2021, dieselfde jaar waarin julle as graad 8 deur ons hekke ingestap het, het sy gesê: “Lig jou oë van die grond af en wees hier. Die Here sê ‘stop, vat ’n oomblik, kyk op en haal asem. Ek is met jou… Ek het jou lief.’ "Lig jou ken en sien die mense rondom jou. Sien die nuwe dag, en as jy gister geval het, dan staan jy vandag op met nuwe moed, nuwe krag en daardie blinkbek-glimlag.”
Hierdie boodskap resoneer vandag sterker as ooit. Julle het deur ’n tydperk van onsekerheid gegroei, julle het verandering oorwin, en julle het bewys dat julle veerkragtig genoeg is om vorentoe te beweeg, nie met vrees nie, maar met vasberadenheid.
Matrieks van 2025, dit is nie die laaste bladsy van ’n boek nie. Dit is die eerste paragraaf van ’n nuwe hoofstuk - een waarin jý die skrywer is. Hou jou waardes naby, jou drome helder, en jou kop altyd hoog genoeg om die moontlikhede raak te sien. Elkeen van julle dra ’n unieke verhaal in die hart, en elke pad wat voorlê is anders. Tog het elke pad iets in gemeen: dit benodig lig. Jou lig.
Gaan uit en wees ’n ligdraer in ’n wêreld wat soms donker voel. Wees getrou aan jouself, leef met integriteit, en jaag jou drome met ’n kombinasie van moed en nederigheid. Onthou dat jou lig nie net vir jou eie pad bedoel is nie, maar ook om ander se paaie te verhelder.
Die wêreld wag vir julle - met uitdagings, ja, maar ook met oorvloedige geleenthede. Lig jou kop, lig jou ken… en ken jou lig.
