Die doel van die Euriade Stigting is om verantwoordelikheid en respek vir mekaar te bevorder op grond van ontmoeting en gesprekke tussen mense en/of hul kulture, agtergronde en aanlegte. Met ander woorde: om die pad na die onbekende te neem en jouself te vind deur ander te leer ken.
Dit is die 11de jaar dat ons as Hoërskool Ben Viljoen die geleentheid het om 4 van ons leerders sowel as twee onderwysers na die Euriade/Kerkrade te stuur, wat plaasvind in die 'Euregio Charlemagne', die grensstreek van Duitsland, België en Nederland.
Vanjaar bestaan ons Graad 11 reisigers uit Andreas Stylianou, Soné Jacobs, Milla Kleynhans en Anel Kock, wat vergesel word deur mev. Elma de Beer en mev. Carla van den Berg. Ons wens u 'n veilige reis toe en ons hoop dat die kennis wat u gedurende hierdie tyd gaan versamel, 'n invloed op u daaglikse lewe sal hê.